Profesori universitar, Mersim Maksuti ka komentuar zhvillimet e fundit politike në vend, pas braktisjes së VLEN-it nga ana e Arben Taravarit. Profesori Maksuti ka deklaruar se kjo lëvizje nuk i shërben demokracisë dhe se nuk është në interes të shqiptarëve. Ai më tej ka deklaruar se kjo braktisje është e pa kuptimtë, duke nënvizuar se këto lëvizje veç se i zhgënjejnë ende më shumë shqiptarët.
“ABSURDITETI JONË POLITIK
Lëvizjet e fundit politike në kuadër të VLENIT dhe braktisja nga ajo e partisë politike Aleancës për Shqiptarët – krahu i Taravarit, paraqet një akt që nuk i shërben as demokracisë, as interesit nacional të shqiptarëve, por as interesit publik.
Aleanca për Shqiptarët – krahu i Taravarit betejën politike duhej ta bënte me një qasje politike konsekuente e sistematike, si pjesë e VLENIT brenda përbrenda koalicionit qeveritar, si zotim që proklamoi me rastin e bashkimit politik të opozitës shqiptare që ishte në funksion të kauzës, misionit të saj – votuesve shqiptare që me vite të tëra sakrifikuan për ta mbajtur gjallë shpirtin opozitar.
Aleanca për Shqiptarët duhej të bënte përpjekje maksimale “të bashkëqeveriste në mes kundërshtive” brenda përbrenda VLENIT, për të avansuar mëtej statusin kushtetues-politik, pra të drejtat kolektive të shqiptarëve apo së paku për t’i ruajtur në shkallën apo pozitën që janë arritur deri më sot, ku fatkeqësisht ka filluar procesi retrograd i degradimit të tyre, siç ka ndodh shpesh në historinë politiko-kushtetuese të shqiptarëve në këtë shtet.
Në demokracinë tonë në RMV, këto metoda të alternimit (ndërrimit) të koalicionimeve partiako-politike non-sense e të shpeshta pa u mbështetur në parime, programe dhe në vullnetin shumicë të votuesve shqiptarë paraqesin një fenomen ekscentrik e shqetësues në qeverisjen tonë dhe hyjnë në kategorinë e trishtimit publik dhe sëmundjen e demokracisë.
Nga ana tjetër BDI duhet të luaj rolin e konstruktiv opozitar siç e ka nisur dhe ardhjen e saj ne pushtet ta
parashikoj vetëm nëpërmjet paraqitjes së alternativave qeverisëse më të mira dhe jo nëpërmjet metodës perfide divide et impera/perçaj e sundo, që shpesh në të kaluarën e ushtronte me sukses.
Këtë qasje opinioniste e bëj në cilësinë e një profesori universitar dhe të njeriut të lirë, madje duke theksuar qartë dhe kategorikisht se nuk i përkasë asnjë provenience partiako-politike.
Kontributin tim do ta jap si çdoherë si një intelektual i pavarur në vijë të afirmimit dhe mbrojtjes së kauzave kombëtare dhe avokat i mbrojtjes së interesit publik”, ka shkruar Maksuti. Ndryshe muaj mé parë, Arben Taravari e prezentoj si prurje të rëndësishme në ASH.
